काठमाडौं, २२ जेठ – बीमा समितिले कोरोना बीमा स्थगन गर्न निर्देशन दिएको छ। बीमा समितिले सबै बीमा कम्पनीहरूलाई पत्राचार गरेर कोरोना बीमा स्थगन गर्न निर्देशन दिएको हो।
बीमा समितिको निर्देशनअनुसार शुक्रबारबाट कोरोना बीमा औपचारिक रुपमा रोकिएको छ। बीमक संघको पत्रको आधारमा कोरोना बीमा स्थगित गर्न निर्देशन दिइएको पत्रमा बताइएको छ।
बीमा समितिका अध्यक्षको सचिवालयलाई बोधार्थ दिएर कार्यकारी निर्देशक राजुरमण पौडेलले बिहीबार सबै कम्पनीलाई कोरोना बीमा बन्द गर्न आन्तरिक निर्देशन दिएका हुन्।
नेपालमा कोरोना संक्रमणलाई दृष्टिगत गरी ३ लाख सेवाग्राहीले कोरोना बीमा गरिसकेका छन्। बीमा गरिसकेका बिमितको दायित्व बहन गर्ने गरी थप बीमा नगर्न समितिको निर्देशन छ।
बीमा समितिको पत्रमा सरकारले बीमा गर्ने बजेट वक्तव्यमा व्यवस्था गरेको उल्लेख गरिएको छ। साथै कम्पनीहरूले दायित्व धान्न सक्ने अवस्था नरहेकाले कोरोना बीमा केही समयको लागि स्थगित गरिएको प्रष्ट पारेको छ।
प्रतिक्रिया