कतै ठोकिन्छ फ्यास्स जान्छ हतार हो जिन्दगी

रञ्जिता पोखरेल दाहाल

गजलः

दौडनु छ गन्तव्यतर्फ रफ्तार हो जिन्दगी।
कतै ठोकिन्छ फ्यास्स जान्छ हतार हो जिन्दगी।

घुमेका छन् बाटाहरु, साँघुरा छन् गल्ली पनि,
हार्दैजित्दै अघि बढ्ने कतार हो जिन्दगी।

परिभाषा आ–आफ्नै, लक्ष्य र बाटो पनि आफ्नै,
आफूभित्र डुबेर त हेर झन्कार हो जिन्दगी।

संसार स्वार्थी छ, हिँड्नु छ लक्ष्यमा पुग्नलाई,
सदाबहार बजिरहने सितार हो जिन्दगी।

माया बाडौँ, सद्भाव र खुशी पनि बाडौँ,
जस्तो कोर्यो त्यस्तै बन्ने आकार हो जिन्दगी।

गाईघाट उदयपुर, हालः मैतीदेवी, काठमाण्डौं