काठमाडौं, २६ वैशाख – नेकपा एमालेका वरिष्ठ नेता झलनाथ खनाल र माधवकुमार नेपाल समूहको स्थायी कमिटी बैठक आज बस्ने भएको छ।
वरिष्ठ नेताद्वय खनाल–नेपाल पक्षका सांसदहरूले राजीनामा दिने सम्बन्धमा थप छलफल गर्न बैठक बस्न लागेको हो। आगामी रणनीतिका विषयमा पनि छलफल हुने नेपाल पक्षका एक स्थायी कमिटी सदस्यले बताए।
यसअघि, शनिबार साँझ बसेको सांसदहरूको बैठकले २ जेठ २०७५ मा फर्कन अध्यक्ष केपी शर्मा ओलीलाई २४ घण्टे अल्टिमेटम दिने निर्णय गरेको थियो।
तर, अदालतको फैसलाअनुसार एमाले पार्टी संरचना, विधान र नेतृत्व मान्न ओली तयार नभए सामुहिक राजीनामा गर्न सांसदहरू तयार भएका छन्।
यसबारे थप छलफल गर्न आज स्थायी कमिटी सदस्यहरुको बैठक हुँदैछ। प्रधानमन्त्रीले विश्वासको मत लिने प्रयोजनका निम्ति सोमबार संसद्को अधिवेशन बोलाइएको छ।
त्यस अगाडि नै ओली २८ फागुन यताको निर्णय रद्ध गर्न तयार नभए नेपाल समूहका सांसदहरूले राजीनामा गर्ने तयारी गरेका छन्।
प्रतिक्रिया