दोहोरो अंकले घट्यो सेयर बजार

काठमाडौं, वैशाख २९ गते । लगातार दुई दिन बढेको सेयर बजार परिसूचक नेप्से बिहीबार भने दोहोरो अंकले घटेको छ । बिहीबार १८.६४ अंकले घटेको बजार २३५०.४२ विन्दुमा आएर रोकिएको छ ।

निर्वाचन अगाडि बिहीबार अन्तिम कारोबार भएको हो । अब मंगलबार मात्र बजार खुल्ने छ । सरकारले साताको दुई दिन विदा दिएपछि अब आइतबार समेत बजार खुल्ने छैन । सोमबार सार्वजनिक बिदा परेका कारण बजार मंगलबार मात्र खुल्ने भएको हो ।

बिहीबार उत्पादन तथा प्रशोधन र अन्य उप समूहमात्र हरियो भयो । अन्य उपसमूह भने राताम्य रह्यो । यस दिन सबैभन्दा धेरै विकास बैंक समूहका लगानीकर्ताले गुमाए । बिहीबार कुल २२८ कम्पनीको कारोबार भएको थियो ।

यस दिन कुल ४० हजार २३ वटा कारोबारबाट ५२ लाख २७ हजार ३५९ कित्ता सेयर किनबेच भएको छ । बिहीबार २ अर्ब ३२ करोड ८४ लाख ३४ हजार २७३ रुपैयाँको कारोबार भएको छ ।
बिहीबार जाल्पा सामुदायिक लघुवित्त वित्तीय संस्थाको सेयर मूल्य सबैभन्दा धेरै १० प्रतिशतले बढेर २४४८.६० रुपैयाँमा पुग्यो । तेह्रथुम पावर कम्पनीको मूल्य ६.२० प्रतिशतले बढेर ५१४ रुपैयाँमा कायम भएको छ ।

सूर्योदय वामी लघुवित्त वित्तीय संस्थाको सेयर मूल्यमा नकारात्मक सर्किट लाग्यो । उक्त कम्पनीको मूल्य १२३६।१० रुपैयाँमा झरेको छ । प्राइमलाइफ इन्स्योरेन्स कम्पनीको मूल्य ७।६३ प्रतिशतले घटेर ५६९ रुपैयाँमा घटेको छ । बिहीबार शिवम सिमेन्टको सबैभन्दा धेरै कारोबार भएको छ ।